Huwebes, Setyembre 8, 2011

Para sa Kanya


“Ang Katulad mong walang Katulad”
Sa una’y sa wikang Ingles, sumunod ay sa Ilokano.
Ngayon na may sa sarili nating wika ko ihahayag ito.
Huwag ka sanang magsasawa sa pagbabasa
Nitong mga tulang pinagpupuyatan ko hanggang mag-umaga.

Halos kada-minuto ko sa iyo sinasabi
Ang pag-ibig ko sa iyo na dinadaan mo lang sa ngiti.
Minsan nga naiisip ko kung ako ba’y payaso.
Dahil sa mga sinasabi ko isang matamis lang na ngiti ang ganti mo.

Tuwing umaga madalas sampagita lang ang sayo’y aking dala
Ngunit lubos akong natutuwa sapagkat kung minsan kahit ito’y tuyo na
Ay nakikita ko parin ang lubos mong saya.
Tunay ngang ikaw ay kakaiba.

Sa mga araw na dumaraan ‘di ko makalimutan ang ating mga kakulitan.
Kilitian dito, kilitian doon at walang humapay nating asaran.
Tunay ngang ang tulad mo’y walang katulad
At habang buhay ikaw lang ang siyang aking hangad.
Ang isang tulad mo’y kaysarap pagsakripisyuhan.
Sadya ngang kapaki-pakinabang kang alayan.
Ang tulad mo’y walang katulad sa buhay ko
At umasa ka na habang buhay ay narito ka sa puso ko.

Sa ngayon, wala na akong ibang mahihiling pa,
Kundi ang makita kang lumigaya.
Kahit na di mo pa masabi sa akin na “mahal din kita.”
Ayos lang basta hihintayin kita kung kailan ka magiging handa.

Di bale nang ang paghihintay ko’y matagalan
Basta mamahalin kita ngayon at magpakailanman.
Sapagkat ang tulad mo’y sadyang walang katulad
At ang pag-ibig ko sa iyo’y laging ilalahad.

Hindi ko alam kung paano ko nagagawa ang mga bagay na ito
Hindi naman ako pinanganak na isang romantiko.
Ngunit kung para sa isang babaeng katulad mo
Lahat ay pagsusumikapan ko at iyan ay totoo.

Huwag mo sanang iisipin na ikaw ay binobola lang.
Ang isang tulad mo’y di ko malilinlang.
Sa iyo ako’y tapat at laging totoo
Kahit sabihan pa ako ng iba ng “ang corny mo!”

Alam kong ako’y hindi perpekto para sa iyo
Ngunit umasa ka na lahat ay pagsusumikapan ko.
Salat man ako sa mga bagay na materyal
Umasa kang bubusugin naman kita sa pagmamahal.

Sabi ko nga sa iyo mag-aaral akong mabuti
Nang sa gayo’y pagdating ng araw di tayo mag-ulam ng kabuti.
Sapagkat sa isang tulad mong walang katulad
Lahat ay aking isasagad.

Sa huling bahagi ng aking tula
Hayaan mong sabihin kong muli sinta.
“mahal na mahal kita” nang higit sa buhay ko
At sa iyo iyan ay laging patutunayan ko.


Walang komento:

Mag-post ng isang Komento